مجالات الامن السيبراني وازاي تختار التخصص اللي يناسبك👨‍💻

بص يا ريس الامن السيبراني بقى مجال مطلوب جدا دلوقتي لان كل حاجه بقت اونلاين وكل الشركات والمؤسسات بقت خايفه على بياناتها من المخترقين وعشان كده بقى فيه تخصصات كتير جدا في المجال ده وكل تخصص ليه دور معين ف حماية المعلومات والانظمه من الهجمات المختلفه في المقال ده هنعرف ايه اهم المجالات دي وازاي تختار المجال اللي يناسبك ويخليك محترف في شغلك

الاول امن الشبكات

ده المجال اللي بيتعامل مع حماية الشبكات من الاختراقات والتهديدات اي شبكه متوصله بالانترنت ممكن تتعرض لهجمات وامن الشبكات دوره انه يمنع الهجمات دي ويحمي البيانات اللي بتتنقل بين الاجهزه عشان محدش يقدر يتجسس عليها او يعدل فيها

بتعمل ايه في المجال ده

• بتحمي الشبكه بجدران الحمايه firewalls اللي بتمنع الدخول غير المصرح بيه
• بتستخدم انظمة كشف التسلل ids وانظمة منع التسلل ips عشان تراقب الشبكه وتمنع الهجمات
• بتشفّر البيانات اللي بتتنقل عشان حتى لو حد قدر يوصل ليها متبقالوش قيمه
• بتحط سياسات امان تمنع اي حد مش مخوّل انه يدخل على الشبكه

الثاني امن التطبيقات

اي تطبيق سواء كان ويب او موبايل او حتى برامج الكمبيوتر ممكن يكون فيه ثغرات الهاكرز بيستغلوها عشان يسرقوا بيانات المستخدمين او حتى يتحكموا في النظام وهنا ييجي دور متخصص امن التطبيقات اللي بيحاول يكتشف الثغرات دي ويصلحها قبل ما حد يستغلها

بتعمل ايه في المجال ده

• بتعمل اختبار اختراق للتطبيقات عشان تكتشف الثغرات الامنيه
• بتراجع كود التطبيق عشان تتأكد انه مكتوب بشكل امن
• بتطبق معايير الامان زي owasp top 10 اللي بتحدد اخطر الثغرات في التطبيقات وازاي تمنعها
• بتستخدم ادوات مختلفة في فحص التطبيقات

الثالث الامن السحابي

دلوقتي كل حاجه بقت في الكلاود من تخزين البيانات لتشغيل التطبيقات وعشان كده لازم يكون فيه متخصصين في تامين البيئه السحابيه من الاختراقات والاخطاء اللي ممكن تتسبب في تسريب البيانات

الرابع التحليل الجنائي الرقمي

لما تحصل جريمه الكترونيه لازم يكون فيه حد بيحقق ويجمع الادله الرقميه عشان يعرف المجرم استخدم ايه وازاي عمل الهجوم هنا بييجي دور المحقق الجنائي الرقمي اللي بيستخرج الادله من الاجهزه وبيانات الشبكه عشان يكشف المهاجمين

الخامس اختبار الاختراق

ده التخصص اللي بيعتمد على التفكير زي الهاكرز عشان تكتشف الثغرات الامنيه قبل ما المهاجمين الحقيقيين يستغلوها يعني بتهاجم النظم والتطبيقات بشكل قانوني عشان تبلغ عنها وتساعد في اصلاحها

السادس الاستجابه للحوادث الامنيه

لما يحصل اختراق لازم يكون فيه فريق متخصص بيحلل الموقف ويحدد ازاي حصل الهجوم ويمنع انه يحصل تاني هنا بقى ييجي دور الاستجابه للحوادث اللي بتشتغل بسرعه عشان تقلل الاضرار وتصلح الثغرات

ازاي تختار المجال اللي يناسبك

لو بتحب الشبكات وعاوز تحميها يبقى امن الشبكات هو المناسب ليك
لو بتحب البرمجه واكتشاف الثغرات في التطبيقات يبقى امن التطبيقات هيكون مجال مناسب
لو مهتم بالكلاود وعاوز تحمي البيانات السحابيه يبقى الامن السحابي هيكون الافضل ليك
لو عندك فضول للتحقيق في الهجمات واسترجاع البيانات يبقى التحليل الجنائي الرقمي هيناسبك
لو بتحب تفكر زي الهاكرز وعاوز تهاجم النظم بشكل قانوني يبقى اختبار الاختراق هو مجالك
لو بتحب التحليل السريع والتعامل مع الاختراقات وقت حدوثها يبقى الاستجابه للحوادث هي مجالك

الخلاصه

الامن السيبراني فيه تخصصات كتير وكل واحد فيهم ليه دور مهم جدا في حماية البيانات والنظم من الهجمات المهم تعرف انت بتحب ايه وتركز عليه وتطور مهاراتك فيه لحد ما تبقى محترف في مجالك